懶人綠化家居 首選水種植物

工作緊張繁忙，返到屋企當然要放鬆一下，放植物搞綠化就最能 relax身心。不過香港家庭多數地方細，無花園無露台，想綠化都不知從何入手。其實，綠化家居唔一定要有露台花園，只要巧妙地放一些小盆栽，便可將大自然引入室內，當中以毋須太多陽光嘅水種植物最好。

客廳　觀葉植物

一入屋，第一眼見到嘅就係個廳，客廳一般空間較大，就算放棵大少少嘅觀葉植物都無問題；而且只要在角落放兩三盆，簡簡單單就能營造一個小花園。

 

浴室　熱帶植物

浴室又係無乜陽光到嘅地方，所以原生地在熱帶雨林、毋須強光和太多水份嘅植物就最啱。放盆栽喺洗手盆隔籬，相信朝早起身見到都覺得特別精神。

睡房　水種植物

植物在夜晚會釋放二氧化碳，所以睡房內放小盆栽如仙人掌便可避免這個問題，只要保持空氣流通就得。睡房大多無乜陽光，水種植物本身又唔需要陽光直接照射或每日淋水，所以最適合。

〔小雨點〕

平復心境改善視力

據顏色學專家所講，綠色代表自然同舒服，睇多啲綠色物件不但令人心境平和，還可改善小朋友視力嘅作用。所以想將屋企變成城市後花園，一盆小植物絕對唔可以睇小，尤其長時間對住電腦，小盆栽就能大派用場，間中望吓能有助放鬆大腦神經，咁諗嘢就自然快啲。不過盆栽有咁多，你又知唔知應該點揀先最啱？

DIY水種植物

Ｂ＆Ｑ資深花王麥 Sir話水種植物唔需要成日淋水，而且種法簡單，最啱初學者或無乜時間打理嘅人。如果是種植初哥，就要看實以下種植步驟。

Steps：

1.先輕洗植物，再放入玻璃瓶內。

2.手拿植物，放石春或者膠珠固定。

3.放到一半後，搖勻以穩固植物，繼續加石春至瓶身 4/5高。

小貼士：

千祈唔好以為污糟，將植物根部洗乾淨，咁樣會傷害到啲根，令植物唔識即時吸收水份，而變黃甚至枯萎。